شيعوضني الدمع

شيعوضني الدمع وانه الخسرته هواي وعله رملة امل كل عمري وشلتهه


وانه الباكو نهاري ورحت ادوره بليل وبلمسودن طبع ميعوف سالفته


على نفس الدرب ذبولي بس الصوف حتى ارجع واكول ذياب ماكلته


وانه الماصبر والعطش ماوازا دنت نفس وذبح بلصحره راحلته


كلب ماجنه كلبي جني متبني جرعت التعب مايوم دللته


طفل من ايدي اكوده وهوه يمشي وياي وعلى ضحكه بكهف للموت نزلته


انقفل باب الصبر كد ما ادك اعليه مو خالي كرم بس انه مللته


بعد ماهد سهم كون الطريده بعيد ما بيهه فخر لو اكول وصلته


وشفت عصفور ميت كل جرح مابيه حرت هذا المنيه شلون واصلته


شلت راسي وشفت بلشجره عش محروك كلت هذا السبب والحركه كاتلته


ونفس موته متت والجسد لحد الروح وحسراتي الجفن وبدمعي غسلته


وسحب سيفه الزمن هل من منازل صاح؟ اعزل ماخفت والزمن نازلته


ما لحته ابد لكن ترسني اجروح بس عندي المهم ماعفته قاتلته


دبسك ياضميري الصار بيك هواي بسك هلعمر مايوم جاملته


حذر بس ولفي نكلت جدم صياد اسال خاطرك مايوم جفلته


كصبه اعله الجرف يحنيه روج الضيم ويحنيني الهوه وبطبعي عدلته